Mazza e ppivezo ditto pure mazza e ppiuzo[1], è ‘nu juoco antico deffuso dô Mediterranejo occidentale a ll’Innia, fuorze arrivato ‘n Ajeropa ‘mmier’ô XV sieculo. Vene cunziderato comm' 'a 'nu sport populare e ogne ttanto s’organizzano turneje 'nternazziunale a llivello agunisteco. A llengua taliana se chiamma lippa, ‘mmece pe ‘a cultura populare 'e certi rreggione ‘e Talia 'o termene vene ausato pe ddescrivere cocche ccosa assaje veloce (es. vaje veloce comme a ‘na lippa).

Dduje guagliune pachistane ca jocano a mmazza e ppivezo

'O regulamiento

'O juoco s’appripara servennose ‘e duje piezze 'e lignamme, spisso taccarianno ‘nu maneco 'e scopa 'e ‘na quinnecina 'e centimmetre luongo cu ddoje ponte (chiamato pivezo), e cchill'ato luongo circa miezu metro chiammato mazza: pe tterra se segna ‘nu chirchio pe nce pusà 'o pivezo. 'A tacnía cunziste a mmenà cu 'a mazza 'o pivezo ‘ncoppa a ‘na ponta pe ffarlo zumpà ‘nterra (pe cchesto se scafunano 'e pponte ô pivezo) e ppo s'àve ‘a recogliore (sempe cu 'a mazza). Tiene tre pussibbeletà, che ffosseno: cogliere 'o pivezo: 'o juoco cunziste a llanzà 'o pivezo 'o cchiù lluntano possibbele.

'O nummero dê jucature nunn è stabbelito. 'A scuatra c'attacca mette 'o pivezo 'nterra e ccerca a vvuttarlo ‘o cchiù luntano pussibbele, pe ttramente 'a scuatra ca defenne se sistema pe essere capace d’acciuffà 'o pivezo a vvolo, ma è ‘na cosa assaje tosta, si ce riesce 'o lanzatore è scalefecato. Ncaso cuntrario da 'o punto addò è fernuto 'o pivezo, 'o difensore, tenennelo mmano po 'o lancia cercanno 'e cogliere 'a mazza pusata arreto a 'o cerchio girata verzo 'o pivezo; si vene còveta, 'o lanzatore sarrà eliminato (chesta operazziona se chiamma “carrà”).

 
'O pivezo miso 'nterra primma d'accumincià 'o juoco

‘Ncaso cuntrario, ll'attaccante tenarrà tre pussibbeletà pe ccogliere e spustà 'o cchiù luntano possibbele 'o pivezo dô chirchio, i aroppo 'o lanzatore àve ‘a valutà a uocchio 'a distanza calculata a bbastune-mazza dô lanzo appena fatto, tra 'o chirchio e 'o punto addó se nne è ccaruto 'o pivezo. Aroppo 'e tre curpe ll'attaccante spia quanno offre 'o difenzore, pe asempio trenta bbastune: si ll'attaccante azzetta chesta distanza, zoè trenta, se scrive 'o nummero a ppunteggio. Si nun ll’accetta, se cuntrolla si 'a valutazzione è corretta ammesurannola; si 'o nummero ‘e bastune è cchiù 'e trenta, pe asempio 35, 'e punte guaragnate ‘a ll’attaccante sarranno 'o dduppio 'e chilli cuntati; si songo ‘nferiure , ll'attaccante se piglia chello ch’àve cuntato. Ô ssoleto, se conta sempe pe ddefietto, ma 'a caratteristeca dô juoco, ‘mmerz’â scompetura, è chillo d’arrisecà. ‘Nzi a cche 'a scuatra ch’attacca nun vene scunfitta, se continua a bbattere pazzianno a tturne alterne ògne gghiucatore.

'O punteggio finale po’ essere 500 opure 1000. Depenne dô tiempo spiso jucanno e ddô nummero ‘e jucature .

‘Mmiezo a ccierte situazzione (curtiglie 'e bbuvere populare, chiazze, ecc.) ce ponno stà "regule dô puosto" che ddanno puntegge spiciale pe 'o superamiento d’ostacule. Pe asempio si se lanza 'o pivezo cchiù aveto ‘e ‘na casa o ddê file dâ currente s’acchiappano cchiù punte (pe asempio 1000 punte).

Nutarelle

  1. Pietro Paolo Volpe, Vocabolario napolitano-italiano tascabile, Napoli, Gabriele Sarracino librajo-editore, 1869, pag. 167

Vvoce pariente